Aberri egunean autodeterminazio eskubidearen aldeko aldarrikapena Eskozian

Inverness-en, Eskoziako iparraldeko Highland-etako hiriburuan harrapatu gaitu Aberri Egunak. Azken aurreko eguna dugu hemen eta nekea nabaria bada ere, gustura ospatu eta aldarrikatu dugu Aberri Eguna.

Etorri garen guztiok, batuta, sentsibilitate ezberdinekoak, batera, elkarrekin eta batuta Aberri Egunean ere elkarrekin aritu gara euskal nazioaren aldarrikapenean. Lehenengo Inverness-ko hainbat lekutan aizkoran, trontzan, lasto altxatzen, dantzan, txalaparta jotzen, harri jasotzen aritu gara. Ondoren guztiok Inverness-ko gazteluko muinora igo eta gaztelu aurrean ekimen honetako aldarrikapena egin dugu: autodeterminazio eskubidearen aldeko aldarrikapena. Baina horrekin batera Aberri Eguna izanik, gogoan izan dugu, hemendik, Eskoziatik Euskal Herria.

Hemen, Eskozian, estaturik gabeko beste nazio batean, independentzia erreferenduma egitekoak dira 2010ean, Alderdi NAzionalita gobernura iritsi zenean agindu zuenez. Badirudi, Britania Handiak oro har, eta Ingalaterrak ere bai, onartzen dutela Eskoziak -beste nazio guztiek bezala- badutela euren etorkizuna erabakitzeko eskubidea. Eta horregatik, etorri ginen hona eta horregatik aldarrikatu dugu are ozenago gaur, Euskal Herriak erabakitzeko duen eskubidea. Gainera, Euskal Herrian ez bezala, hemengo abertzale guztiak batera elkartu gara eta batera ospatu dugu Aberri Eguna. Beno, ospatzen hasi, oraindik ordu batzuk bai baititugu azken zerbezak edan eta azken gaua probesteko.

Lehen euskal erakustaldia Eskozian

Edimburgo, arratsaldeko 2ak. Meadows parkea. Dena prestatuta dago. Parkeko zelai zabal eta pasealekuen artean, ikurrinak, harriak, txingak, txalaparta, musika instrumentuak, etab. Ikusten dira. Bat-batean Joaldunen hotsa entzuten da urrutian, gerturatzen ari dira, zarata handitzen doa eta jendeak ikusminez begiratzen die. Haiek aurretik direla, talde guztia sartu gara ekitaldia egin beharreko eremura. Txalo artean hartu gaituzte. Sekulakoa.

Azalpena eman diegu gerturatu direnei. Asko Edinburgon bizi diren euskaldunak eta kataluniarrak. Baina baita Eskoziako bertako eta munduko beste hainbat lekutako jendea ere (Zerbaitegatik gara “Nazioen Mundua”). Eta lehen azalpenaren ondoren etorri da ekitaldia: txalaparta, Iker Zubeldiaren bertsoak, herri kirolak, Miren Urkiolaren erakustaldia, dantzariak, etab.

 

Jendea harrituta eta gustura aritu da begira, ikusten zuenarekin gustura, eta asko harrituta. Bitartean, taldeko beste batzuek Idiazabalgo gazta zatitu eta jende artean banatu dute: kirolak, musika eta dantzak adina gustatu zaie.

 

Eta azkenean, saioari amaiera emateko gure aldarrikapena. Joaldunak aurretik hartuta denok goiburu baten atzean jarri gara. Batzen gaituen hori baita: “autodeterminazio eskubidea · self-determination”. Txalo artean puztu eta poztu gaituzte. Eta horrenbestez amaitu da saioa. Sekulakoa. Baina amaiera horri kolore are gozoagoa uztearren, kalejira eta korro erraldoi bat egin dugu, Daniren soinu hotsen gidaritzapean. Halako korrorik ez da ikusi aspaldian Euskal Herrian. Eta jakina! Gurekin batera dantza egin dute ikustera inguratu direnek.

Eskozia-Euskal Herria konexioak funtzionatu du eta oso gustura geratu gara. Orain HIghlands-etara bidean gara, hau da, Eskoziako Goierrira goaz. Eguraldiarekin dugu beldur gehien. Gaur Edinburgo hotz egiten zuen eta tartean-tartean, antziarra ere bota digu. Eta Inverness-tik (Highlands-eko hiriburutik) ditugun azken berriek diote elurra dagoela. Ez dakit zuzen iritsiko garen: baietz espero. Baina ez dugu dudarik dena ondo irtengo dela, Edinburgon baino hobeto ahal bada gainera! Izan ere, segurtasun eta seguru arrazoiak direla-eta, aizkoran, trontzan eta lasto altxatzen aritzerik ez dugu izan, eta hori ikuskizunaren kalte izan da. Gainera, HIghlands-eko jendea ez da hiriburukoa. Gure moduko “artzaiak” dira hangoak ere, eta oso ondo moldatuko garela uste dugu. Ikusiko dugu!

Nekatuta baina ilusioz gainezka

Bidaiaren erdia egin dugu. Orain artekoa sekulakoa izan da guztiontzat. Baina orain hasi da ikuskizunen soka eta horrek erantzukizun handia du guretzat. Hirutik bat egin dugu eta datozen biak are politagoak eta hobeak izango direla sinetsita gaude.

Baina egiari zor, esan behar dugu nekatuta ere bagaudela. Etorrerako bidaia bera, hegaldiak zirela eta, gogorra izan zen. Harez gero, kontu asko izan ditugu egiteko eta lotzeko, eta hori nekagarria da. Gainera, Eskoziako zerbeza oso ona dela kontuan hartuta, ba, loari ordu batzuk kendu dizkiogu garagardoz betetzeko. Gainera, Dani eta Txapi egonda, sekulako festa montatzen dute edozein lekutan. Pub-etan hango musikariekin batera jotzen dute, kaleetan kalejiran ibiltzen dira eta Hostaleko pub-ean euskal musika, bertsoak, kantuak eta dantzak eguneroko kontua dira.

Azkenean, nahi edo ez, nekatu ere egiten da bat, baina gustura eta batez ere ilusioz beteta gaude. Gainera, gure artean oso jende eta talde ezberdinak egon arren, gero eta giro, konfiantza eta laguntasun hobea dago. Eta hori ere oso pozgarria da.

Autobusa badoa aurrerantz. Gehienak lo doaz, eta beste batzuk, tartea aprobetxatuz, blogean gure berri ematen. Baina guztiok ilusioz gainezka gaude, geratzen zaigun bidaiaren eta proiektuaren oraingo zatiei sekulako zapore ona emateko. Nekatuta baina ilusioz gainezka gaude.

HIghland: Goierri is coming!

Eskoziako parlamentuan elkarrizketa interesgarriak

Prestaketak egiteko eta Edinburgoko bazterrak ikusteko eguna izan da gaurkoa. Goiza nahiko goiz hasi dugu, batez ere, bart gauean batzuen (gehienen) erretiroa ez zela oso goiz izan kontuan hartuta. Gauekoek kapitulo aparte bat agian mereziko lukete, baina Jainkoari esker, gauean kamarak nahiko urrutik ibiltzen dira eta hala hobe. Baina munduak jakin dezan, bertso saioak, trikitixa eta dantza bihurtu zen Edinburgon errege; hori bai, euskaldunotara beste batzuk ere batu ziren eta haietako baten esanetan “we are the best of the world”. Beno, autobonboa ez da agian gairik egokiena eta ezta gure burua horrela goratzen aritzea ere, baina halaxe izan zen eta jarri egin behar. A! eta bertsoren bat edo beste ere entzun zuen hori esan zuen guy hark, nahiz eta ulertu guk ingelesez baino askoz gehiago ez zuen egin. En fin… gaueko gauzak.

Baina esaten ari nintzena, gaurko eguna: hori da eta garrantzitsuena. Nahiko egun librea izan dugu hemen gabiltzan 90 lagunok. Bakoitzak bere kaxa edo taldetxoka bazterrak ikusteko parada izan dugu eta egia esan eskertzen da horrelako paraje batera etorri eta hosteleko paretak ez diren beste zerbait ikustea. Gainera, ostiralean aktuazioa egingo dugun lekua ere bisitatu dugu eta aktuazio horretarako azken xehetasunak lotzen aritu gara Udalekoekin, baina guzti-guztiak ez ditugu lotu oraindik. Biharko ere zerbait utzi behar.

Eta eguneko hitzordu garrantzitsuena Eskoziako Legebiltzarrean izan dugu. Denok joaterik ez genuen, baina Xavier Solanok lortutako kontaktuei esker, bi Legebiltzarkide elkarrizketatu ditugu. Batetik Alderdi Unionistako Des McNulty elkarrizketatu dugu eta bestetik, SNP Alderdi Nazionalistako Keneth Gibson. Plazer bat izan da euren ikuspuntua jasotzea eta politikaz duten iritzia bildu eta grabatzea. Prestutasunez erantzun diete gure galderei bakoitzak berea defendatuz. McNultyk Eskoziak Erresuma Batuko kide izaten jarraitu behar duela uste du, batez ere zergen gaian autogobernu gehiago edukiz. Gibson-ek ordea, Eskoziarentzat onena independentzia dela uste du eta Gobernuan dagoen bere alderdiak horretarako erreferenduma egingo duela agindua du 2010erako.

Grabazioa denborarekin Goierri Telebistan ikusi ahalko da eta sarean ere jarriko dugu. Bitartean, guk esandakoa sinetsi eta euren testigantza benetan interesgarria dela onartu beharko duzue.

Horretan ba, gaurko gure kontuak. Orain bilera dugu elkarrekin, biharko hainbat gauza erabakitzeko, bihar ere ez baitugu aktuaziorik. Baina seguruenik kalejira egingo dugu trikitixa, joaldun, etab. ostiraleko gure saioa iragartzeko. Kontatuko dizuegu. Gabon pasa. Gu pinta bana edatera goaz.

Edinburgoko saioa

Ostirala, martxoak 21, eguerdiko 12etan sekulako saioa izango da Edinburgoko CALTON HILL parkean. Idiazabaldik eta ingurutik etorritako autodeterminazio eskubidearen aldeko ekimenak herri-kirol, euskal dantza, musika, bertso, etab. saioa egingo du.  You are all invited. Next friday in Calton Hill in Edinburgh.

Edinburgo konektion

Edinburgo erdi-erdian dagoen hostal batean gaude. Iristeko 100 lagunetik oraindik guztiak ez gara iritsi. Baina bidaia ari da zentzua hartzen. Furgonetan ostiralean abiatu ziren 5 lagunak iritsi dira. Eurekin ekarri dituzte aizkora, harri, lasto altxatzeko, txinga, etab. Eta gainera sagardoa eta gazta ere iritsi da (harrigarria badirudi ere).

 Gainontzeko guztiontzat bidaia eguna izan da gaurkoa. 5 hegalditan etorri gara guztiok. Batzuk goizeko 5:30etan abiatu gara Idiazabaldik autobusez. Handik Miarritzeko aireportura joan gara. Goizeko aurpegiak ikustekoak ziren:

 Handik Parisera hegaldia egin dugu batzuk. Beste batzuk Bilbotik goizean abiatu dira eta beste batzuk eguerdian Bilbotik bertatik. Iruñeako gure joaldun artistak berriz, lehenengo Madrilera joan dira, gero handik Londonera eta azkenik Edinburgora. Haietakoren baten maleta bidean geratu da, baina lasai asko ari dira oraintxe bertan zerbeza edaten. Bilboko azkeneko taldea, berriz, oraindik ez zaigu iritsi.

 Eguna aireportuetan pasa dugu, eta polita izan dela esan beharko, ilusioz beterik baigatoz, zeren gainontzean, nahiko aspergarria izan da. Argazkiak horren testigu:

 

Eta honenbestez, zuen baimenarekin, afaltzeko agurtzen gara. Bihar egun gogorra izango dugu. Ez dugu saiorik izango, baina hainbat elkarrizketa egingo dizkiegu Eskoziako Legebiltzarreko parlamentariei, eta horrez gain, saioak antolatzeko lanetan ere arituko gara. Gabon pasa Edinburgo aldetik.

Ekimena aurkeztuta Eskozia aldera abiatzeko prest gara

Koldo Mitxelena Kulturunean emandako prentsaurrekoan aurkeztu dugu gure herri ekimena. Orain jada, prest gaude, bihar goizean Eskozia aldera abiatzeko.

Prentsaurrekoan ekimenaren berri eman dugu: zeintzuk diren gure helburuak, zein gaude proiektu honen atzean eta zer egingo dugun datozen 6 egunetan Eskozia aldean. Honatx prentsari banatutako dokumentua:

“

Bihar irtengo da autodeterminazio eskubidearen aldeko Idiazabalgo herri ekimena Eskozia aldera

Herri kirolak, euskal dantzak, euskal musika, joaldunak, txalaparta, bertsolariak, etab. batzen dituen ekimenak autodeterminazio eskubidea aldarrikatu eta hainbat erakustaldi emango ditu Eskozian.

100 pertsonako herri ekimenean adin eta sexu ezberdineko oso pertsona ezberdinak elkartu gara goiburu baten baitan: herri guztiek etorkizuna erabakitzeko duten eskubidearen baitan. Ez gara politikoak eta ez dugu inongo alderdirik atzean. Herritar soilak gara, eta bakoitzak egiten dakienetik, batzea posible dela erakutsi nahi dugu. Oso kolore eta sentsibilitate ezberdineko jendea gara, ilusioz beteta, elkarri eskua eman eta batzen gaituenean aurrera egin nahi dugunak. Nazkatuta gaude politikarien alderdikeri eta bide antzuez. Ez dugu ulertzen, politikariak nola ez diren gauza, elkarrekin bidearen zati bat bederen egiteko. Eta horixe da guk egin nahi duguna, posible dugun azken bidegurutzera arte elkarrekin joan.

Herri ekimenean Idiazabalgo herri kirol taldea, Beasaingo Aurtzaka eta Ostadar dantza taldeak, Beasaingo txalaparta-jotzaileak, Iruñeako joaldunak, Iker Zubeldia bertsolaria, Miren Urkiola harri-jasotzailea eta beste hainbat elkartu gara, besteak beste. Elkarrekin hiru saio eta erakustaldi egingo ditugu Eskozian:

· Ostirala, hilak 21: Edinburgoko parke batean egingo dugu saioa

· Larunbata, hilak 22: Iverness-en (Highland) egingo dugu saioa

· Igandea, hilak 23: Iverness-en (Highland) egingo dugu saioa eta Aberri eguna elkarrekin ospatuko dugu.

Baina, gure ustez, benetako erakustaldia ez da saio horiek Eskozian egitea. Benetako erakustaldia herri-ekimena bera da. Ilusioz beterik elkarrekin batu, eta ahal den bide guztia elkarrekin egitea. Gure ekimenak demostrazio bat izan nahi du euskal gizartearentzat: posible dela erakutsi nahi dugu; eta euskal politika irtenbiderik gabeko zurrunbiloetan sar ez dadin herritar soilok horrelako ekimenak egitea posible eta beharrezkoa dela aldarrikatzen dugu. Gure kasuan autodeterminazio eskubidea eta euskal nortasuna da batzen gaituen hori. Hortik aurrera bakoitzak bere ideiak ditu, baina batzen gaituen horretan elkarrekin joan nahi dugu.

NAZIOEN MUNDUA jarri diogu izena ekimenari. Eta kasu honetan Eskozia aukeratu dugu gure aldarrikapena eramateko. Autodeterminazio eskubidearen gaia hantxe fokalizatuta dago Europan, Gobernuan dagoen Alderdi Nazionalistak independentzia erreferenduma egitea aginduta baitu. Eskoziako testigantza jaso nahi dugu eta gurea hara zabaldu. Horretarako hainbat elkarrizketa hitzartuta ditugu Eskoziako parlamentuko alderdi ezberdinekin (nazionalista nahiz unionistekin). Baina gurea ez da bidaia instituzionala; herritarren arteko uztartzea da. Horregatik, etorkizunerako bideak irekita utziko ditugu, Eskoziatik Euskal Herrira ere etor daitezen antzeko ekimenekin.

Herritar garen heinean, erantzukizuna dugu gure ustez, ahal duguntxo hori egiteko; eta horretan saiatuko gara. Ez dugu nahi inork betiko etiketa politikorik jar diezagun, ez baitugu inongo alderdirik atzean. Gure politika oso sinplea da: logikaren politika. Noraino joan gaitezke elkarrekin? Ba haraino behintzat hel gaitezen. Horixe da egin duguna eta horixe da erakutsi nahi duguna.

Gure ekimenaren berri izateko edo bidaiako gorabeherak jarraitzeko www.eskoizal.wordpress.com blogean, www.goierrikohitza.info webgunean eta www.goierritelebista.com webgunean duzue aukera.”

Martxan da gure bloga

Egun on guztioi.

Duela hilabete batzuk proiektua bezala, hementxe eta oraintxe jaiotzen da gure blog xume hau. 80 laguneko gure taldean oso jende ezberdina eta balio handikoa badago ere, web-eko crack-ik ez dugu, beraz blog xume honekin konformatzen gara (momentuz).

Blog hau izango da gure komunikazio bide nagusia. Hemen jarriko ditugu gure eguneroko ibilerak, argazkiak eta bideoak eta espero dugu, proiektuan interesa duten guztiek hemendik jarraitu ahalko gaituztela. Hau lehenengo post txiki bat baino ez da, baina datozen egunotan, egunero-egunero emango diogu jaten blog honi. Izan ere, hiru egun baino ez dira geratzen egun handirako: gure bidaia hasteko.

Bloga probatzen

Blog berria egin dut eta oraintxe bertan probatzen ari naiz ea zer moduz dabilen. Ikusiko dugu…